So, diesmal muss ich den Beitrag auf Schweizerdeutsch schreiben, es passts sonst einfach nicht ganz =).
Mengmol denki scho, was mit es paarne Lüt lauft. Es isch scho e wili her, aber irgendwie mueni das jetzt no eimol füre hole. Am 27. Janur het mir plötzlich öppert es SMS gschribe. Ich zitier jetzt eifach mol de Inhalt.
«Ehij höbschi
wege morn ech chan glaub ned cho weli noni s geld ufem konto han! Abr es anders mol ok? schlof süess ly»
«Ehij was machsch so!? Han ebe z vel sms»
Nochträglich denki, dasi eifach öppis anders hett sölle zruggschribe und mi het müese amüsiere. Wie au immer, ich hann halt eifach mol ganz easy zrugg gschribe:
«wer bisch du..? han dini nr ned..»
Tja und – di hütig jugend halt – wa schribt er mir zrugg (name mol zensiert):
«De n*** de vo netlog nd msn nd sow….»
Tja, so trifft mer die zuekünftig Liebi. Me schribt uf Netlog en Kommentar im Sinn vo “Bisch di Schönscht, gsehsch echt super us blabla bla, ich lieb dich bla bla.” Irgendwenn hett mer d Handynummere und wött sich treffe.
Mini Meinig zu dem isch eigentlich eifach, dasi das lächerlich find. Wer im Lebe nümm cha lüt kennelerne ohni die Person vorher im Internet gfunde z ha, de macht eifach öppis falsch und luegt vor allem ufs Üssere.
Aber zum Glück gits au no die andere Mensche wo ganz normal sind, aber über die chammer halt ned so easy blogge, wills halt.. normal sind.
I dem Sinn wünschi eu no en schöne Sunntig ;-)
Gruess,
Michael Eugster